| निषादर्षभगान्धारषड्जमध्यमधैवताः |
| पञ्चमश्चेत्यमी सप्त तन्त्रीकण्ठोत्थिताः स्वराः |
| काकली तु कले सूक्ष्मे ध्वनौ तु मधुराऽस्फुटे |
| कलो मन्द्रस्तु गम्भीरे तारोऽत्युच्चैस्त्रयस्त्रिषु |
| नृणामुरसि मध्यस्थो द्वाविंशतिविधो ध्वनिः |
| स मन्द्रः कण्ठमध्यस्थस्तारः शिरसि गीयते |
| समन्वितलयस्त्वेकतालो वीणा तु वल्लकी |
| विपञ्ची सा तु तन्त्रीभिः सप्तभिः परिवादिनी |
| ततं वीणाऽऽदिकं वाद्यमानद्धं मुरजाऽऽदिकम् |
| वंशाऽऽदिकं तु सुषिरं कांस्यतालाऽऽदिकं घनम् |
| चतुर्विधमिदं वाद्यं वादित्राऽऽतोद्यनामकम् |
| मृदङ्गा मुरजा भेदास्त्वङ्क्याऽऽलिङ्ग्योर्ध्वकास्त्रयः |
| स्याद् यशःपटहो ढक्का भेरी स्त्री दुन्दुभिः पुमान् |
| आनकः पटहोऽस्त्री स्यात् कोणो वीणाऽऽदिवादनम् |
| वीणादण्डः प्रवालः स्यात् ककुभस्तु प्रसेवकः |
| कोलम्बकस्तु कायोऽस्या उपनाहो निबन्धनम् |
| वाद्यप्रभेदा डमरुमड्डुडिण्डिमझर्झराः |
| मर्दलः पणवोऽन्ये च नर्तकीलासिके समे |
| विलम्बितं द्रुतं मध्यं तत्त्वमोघो घनं क्रमात् |
| तालः कालक्रियामानं लयः साम्यमथाऽस्त्रियाम् |
| ताण्डवं नटनं नाट्यं लास्यं नृत्यं च नर्तने |
| तौर्यत्रिकं नृत्यगीतवाद्यं नाट्यमिदं त्रयम् |
| भ्रकुंसश्च भ्रुकुंसश्च भ्रूकुंसश्चेति नर्तकः |
| स्त्रीवेषधारी पुरुषो नाट्योक्तौ गणिकाज्जुका |
| भगिनीपतिरावुत्तो भावो विद्वानथाऽऽवुकः |
| जनको युवराजस्तु कुमारो भर्तृदारकः |
| राजा भट्टारको देवस्तत्सुता भर्तृदारिका |
| देवी कृताभिषेकायामितरासु तु भट्टिनी |
| अब्रह्मण्यमवध्योक्तौ राजश्यालस्तु राष्ट्रियः |
| अम्बा माताऽथ बाला स्याद्वासूरार्यस्तु मारिषः |
| अत्तिका भगिनी ज्येष्ठा निष्ठानिर्वहणे समे |
| हण्डे हञ्जे हलाऽऽह्वाने नीचां चेटीं सखीं प्रति |
| अङ्गहारोऽङ्गविक्षेपो व्यञ्जकाऽभिनयौ समौ |
| निर्वृत्ते त्वङ्गसत्त्वाभ्यां द्वे त्रिष्वाङ्गिकसात्त्विके |
| शृङ्गारवीरकरुणाऽद्भुतहास्यभयानकाः |
| बीभत्सरौद्रौ च रसाः शृङ्गारः शुचिरुज्ज्वलः |
| उत्साहवर्धनो वीरः कारुण्यं करुणा घृणा |
| कृपा दयाऽनुकम्पा स्यादनुक्रोशोऽप्यथो हसः |
| हासो हास्यं च बीभत्सं विकृतं त्रिष्विदं द्वयम् |
| विस्मयोऽद्भुतमाश्चर्यं चित्रमप्यथ भैरवम् |
| दारुणं भीषणं भीष्मं घोरं भीमं भयानकम् |
| भयङ्करं प्रतिभयं रौद्रं तूग्रममी त्रिषु |
| चतुर्दश दरस्त्रासो भीतिर्भीः साध्वसं भयम् |
| विकारो मानसो भावोऽनुभावो भावबोधकः |
| गर्वोऽभिमानोऽहङ्कारो मानश्चित्तसमुन्नतिः |
| दर्पोऽवलोकोऽवष्टम्भश्चित्तोद्रेकः स्मयो मदः |
| अनादरः परिभवः परीभावस्तिरस्क्रिया |
| रीढाऽवमाननाऽवज्ञाऽवहेलनमसूर्क्षणम् |
| मन्दाक्षं ह्रीस्त्रपा व्रीडा लज्जा साऽपत्रपाऽन्यतः |
| क्षान्तिस्तितिक्षाऽभिध्या तु परस्य विषये स्पृहा |
| अक्षान्तिरीर्ष्याऽसूया तु दोषाऽऽरोपो गुणेष्वपि |
| वैरं विरोधो विद्वेषो मन्युशोकौ तु शुक् स्त्रियाम् |
| पश्चात्तापोऽनुतापश्च विप्रतीसार इत्यपि |
| कोपक्रोधाऽमर्षरोषप्रतिघा रुट्क्रुधौ स्त्रियौ |
| शुचौ तु चरिते शीलमुन्मादश्चित्तविभ्रमः |
| प्रेमा ना प्रियता हार्दं प्रेम स्नेहोऽथ दोहदम् |
| इच्छा काङ्क्षा स्पृहेहा तृड् वाञ्छा लिप्सा मनोरथः |
| कामोऽभिलाषस्तर्षश्च सोऽत्यर्थं लालसा द्वयोः |
| उपाधिर्ना धर्मचिन्ता पुंस्याधिर्मानसी व्यथा |
| स्याच्चिन्ता स्मृतिराध्यानमुत्कण्ठोत्कलिके समे |
| उत्साहोऽध्यवसायः स्यात् स वीर्यमतिशक्तिभाक् |
| कपटोऽस्त्री व्याजदम्भोपधयश्छद्मकैतवे |
| कुसृतिर्निकृतिः शाठ्यं प्रमादोऽनवधानता |
| कौतूहलं कौतुकं च कुतुकं च कुतूहलम् |
| स्त्रीणां विलासबिब्बोकविभ्रमा ललितं तथा |
| हेला लीलेत्यमी हावाः क्रियाः शृङ्गारभावजाः |
| द्रवकेलिपरीहासाः क्रीडा लीला च नर्म च |
| व्याजोऽपदेशो लक्ष्यं च क्रीडा खेला च कूर्दनम् |
| घर्मो निदाघः स्वेदः स्यात्प्रलयो नष्टचेष्टता |
| अवहित्थाकारगुप्तिः समौ संवेगसंभ्रमौ |
| स्यादाच्छुरितकं हासः सोत्प्रासः स मनाक् स्मितम् |
| मध्यमः स्याद्विहसितं रोमाञ्चो रोमहर्षणम् |
| क्रन्दितं रुदितं क्रुष्टं जृम्भस्तु त्रिषु जृम्भणम् |
| विप्रलम्भो विसंवादो रिङ्गणं स्खलनं समे |
| स्यान्निद्रा शयनं स्वापः स्वप्नः संवेश इत्यपि |
| तन्द्री प्रमीला भ्रकुटिर्भ्रुकुटिर्भ्रूकुटिः स्त्रियाम् |
| अदृष्टिः स्यादसौम्येऽक्ष्णि संसिद्धिप्रकृती त्विमे |
| स्वरूपं च स्वभावश्च निसर्गश्चाथ वेपथुः |
| कम्पोऽथ क्षण उद्धर्षो मह उद्धव उत्सवः |